Mir gniesse z viert üses Rosslebe uf em Burehof. Fasch z ganze Jahr dörfe mir dusse uf üsere Weid verbringe, wo mir üs chöi ustobe, gegesitig chräbele und ou gnue Platz hei für ab und zue üsi Rangordnig z kläre. Im Winter chöme mir de glich gern i trochnig und warm Stau cho übernachte und ou a sehr heisse Summertäg flüchte mir dört vor der Hitz und de Bräme.
Mir si vier starchi Persönlechkeite und liebe der Ustusch mit de Lüt und würde üs gern no churz einzu vorsteue:
Rico: Unger de Ching wo der Hof scho lenger begleite bini ir Zwüschezit scho fasch chli der Star vom Hof und i wirde ou regumässig im Dorf oder im Waud vo de Ching erkennt und begrüesst. I begleite gern verschidnigi Aktivitäte mit de Ching und trage se mit viu Freud, Stouz und Zueverlässigkeit düre Waud. Ou d Massage bim Putze vor und nach em Rite oder Spaziere gniessi sehr.
Hanap: Zeme mit em Rico ghöri zur eutere Generation unger de Ross und bi sogar der Eutischt vo üs vier. I bi scho i mir wouverdiente Rente, mache gern Waudspaziergäng und gniesse die länge Summerabige uf der Weid.
Sureika: Aus Mami vor Sina bini eini vo de Hofdame. I ungerstütze der Rico gern bi de Chinderaktivitäte, mache gern längi Usritte und la mir usgiebigi Kuschuiheite nid la neh. Zwüsch düre hanis fuschtdick hinger de Ohre aber merke sofort wenns druf a chunnt und gibe denn immer mis beste und bi absolut zueverlässig.
Sina: Aus Tochter vor Sureika bini sie zwöiti Hofdame. Zeme mit der Sureika stah ig gern aus Mami-Tochter-Gspann vor der Kutsche und gniesse im Summer schöni Usfährtli. I bi sehr neugierig, due aues immer mit grosse Ouge beguetachte (das hani eue vom Mami) und lehre gern und schneu derzue. Uf der Weid nim igs aber ou mau gmüetlech und gniesse z feine Gras oder z chuschtige Heu wo mir mit de Chüeh teile.
Danke Florence für di Biitrag
0 Comments